RRC |
رۆژی دووشەممە، 12تەمووز، ناوەندی لێکۆڵینەوەی رووداو کۆبوونەوەیەکی داخراوی بە بەشداریی چەند دپیلۆماتێکی ئەوروپی لە هەولێر و ژمارەیەك كەسایەتی سیاسی و ئەكادیمیی هەرێمی كوردستان، لەبارەی سیاسەتی یەكێتی ئەورووپا بەرامبەر عێراق و هەرێمی كوردستان رێكخست. لە گفتوگۆكاندا مژارەكانی وەك هەڵبژاردنی پێشوەختەی عێراق و پیشهاتە سیاسی و ئەمنییەكان، هەروەها پەیوەندییەكانی بەغدا و هەولێر لەگەل هێڵەكانی سیاسەتی یەكێتی ئەورووپا بەرامبەر عێراق و هەرێمی كوردستان باسیان لێ كرا.
لە کۆبوونەوەکەدا جەخت لە بایەخی پرۆسەی هەڵبژاردن و چاودێریی نێودەوڵەتی بۆ شەفافییەتی هەڵبژاردن کرایەوە.
هەروەها باس لەوە کرا کە دۆخێکی هەستیاری ئەمنی و سیاسی لە ئارادایە و ئەگەر بێتو گۆڕانکاری نەکرێت و دیموکراسیی زیاتر بەرەو پێش نەڕوات، ئەگەری گۆڕانکاری دیکە دێتە ئاراوە.
هەرچەند هاوڕاییەک هەبوو لەسەر ئەوەی کە دۆخی عێراق هەڕەشەیەکی سیستەمێک بۆ ئەورووپا دروستناکات بەڵام، پرسەکانی وەکوو کۆچی نایاسایی، تیرۆر و ناسەقامگیری، سنوورە جوگرافیاییەکان دەرباز دەکەن و کاریگەری لەسەر ئەورووپاش دادەنێن.
گرنگیی پاڵپشتی ئەورووپاش لە دیموکراسی و سەقامگیری لە عێراق، یەکێکی دیکە لەو مژارانە بوو کە باسی لێکرا و جەخت لەوە کرایەوە کە دەبێ لەوەدا رۆڵێکی زیاتر بگێڕێت.
