ئا: ئیسڕا ئەنوەر

رۆژی 9ی تشرینی دووەمی 2024 ناوەندی لێکۆڵینەوەی رووداو بەشداری کرد لە دیداری سەرکردەکانی ناوەندەکانی توێژینەوەی عێراق بە ئامادەبوونی سەرۆکی رەوتی حیکمە "عەممار حەکیم" کە دامەزراوەی ئەنکی بۆ لێکۆڵینەوە و توێژینەوە رێکیخستبوو  لە بەغدا.

ناوەندی لێکۆڵینەوەی رووداو یەکێک بوو لەو ٢٥ ناوەندەی کە بەشدارییان لە دیدارەکەدا کرد، لە دیدارەکەدا چەند تەوەرێکی جیاواز گفتوگۆی لەبارەوەکرا و لە تەوەری یەکەمدا باس لەو ئاستەنگییانە کرا کە رووبەڕووی ناوەندەکانی لێکۆڵینەوە دەبن لە عێراق و هەروەها دۆزینەوەی چارەسەر بۆیان و لە تەوەری دووەمیش باس لە بەرەوپێشبردنی رۆڵی ناوەندەکانی لێکۆڵینەوە کرا دواتر لە تەوەری سێیەم و کۆتاییدا باس لە داینامیکی پەیوەندی بەردەوامی نێوان ئەو ناوەندانە کرا.

عەممار حەکیم سەرۆکی رەوتی حیکمە لە بەشی دووەمی دیدارەکەدا دڵخۆشی خۆی دەربڕی بە ئامادەبوونی بەرپرسانی ناوەندەکانی توێژینەوە و گوتی "پێویستە ئەم ناوەندانە هاوئاهەنگییان هەبێت بۆ ئەوەی بتوانن رۆڵی خۆیان بە شێوازێکی دروست ببینن و بتوانن یارمەتی بڕیاربەدەستان بدەن و بەرچاو روونیان پێشکەش بکەن و ناوەندەکانی توێژینەوە لە تەواوکردنی هەیکەلی دەوڵەتی عێراق گرنگی خۆیان هەیە. هەروەها، عێراق دوای ئاستەنگی درێژخایەن بەرەو قۆناخێکی نوێی سەقامگیری هەنگاوی ناوە و پێویستە رێکخراوی چالاکی مەدەنی لە ناوەندەکانی لێکۆڵینەوە جودا بکرێتەوە" . سەرۆکی رەوتی حیکمە ئاماژەی بەوەکرد "کە هیچ کێشە لەوە نییە هەر ناوەندێکی لێکۆڵینەوە بتوانێت یارمەتی هەر لایەنێکی حزبی بدات جا بە توێژینەوە بێت یاخود بە داتای زانستیانە. هەروەها،  گرنگ نییە بێلایەن بن، بەڵام گرنگە بێ جیاوازی بتوانن خزمەت بە هەموو بڕیار بەدەستان بکەن کە سەر بە هەر لایەنێک بن و ئەگەر ناوەندەکانی لێکۆڵینەوە توانییان ئەو رۆڵە بە شێوازی دروست ببینن ئەوسا بڕیاربەدەستان و سیاسەتمەداران خۆیان پەنا بۆ ناوەندەکانی لێکۆڵینەوە دەبەن.

لە کۆتایی دیدارەکەدا جەخت لە بەردەوامی دیدارەکان و بنیاتنانی پەیوەندی لەنێوان ناوەندەکانی لێکۆڵینەوە کرایەوە لەسەرتاسەری عێراق بە هەرێمی کوردستانیشەوە.