بەناوی خوای بەخشندەی میهرەبان
بەڕێزان، ئامادەبووان سڵاوتان لێبێ.
دڵخۆشم ئەمڕۆ لەم کۆنگرەیەدا قسەتان لەگەڵ دەکەم و سوپاسی خۆیشم ئاراستەی تۆڕی میدیایی رووداو دەکەم بۆ رێکخستنی ئەم بۆنەیە کە کۆمەڵێکی دەستەبژێر لە کەسایەتیی سیاسی و فکریی بۆ گفتوگۆ لەبارەی بابەت و مژارە ستراتیژییەکان کۆکردووەتەوە. مژارەکان بۆ عێراق و بۆ ناوچەکە و جیهانیش گرنگن.
لە راستیدا سازدانی کۆڕبەندی لەم جۆرە و لەم ئاستە بڵندە لەڕووی بەشدارییەوە، بە دڵنیاییەوە نیشانەی هەستانەوەی عێراق و پایەدارکردنی ژیانی دیموکراسییە، دەریدەخات گفتوگۆی کراوە و دایەلۆگی راشکاوانە بەشێکی بنچینەییە لە رێبازی سیاسیی ئێمە، ئەمەش خزمەتی بنیاتنانی دەوڵەت و داخوازییەکانی گەلەکەمان دەکات لە بەدیهێنانی ئاسایش و سەقامگیری دا.
ئەمڕۆ بەهۆی باوەڕمان بە دیموکراسی، کۆتاییمان بە سەردەمی جەنگ و ململانێ هێناوە کە ساڵانێکی درێژ گیرۆدەی بووین. هەنگاومان بەرەو سەردەمی ئاشتی و سەقامگیری و گەشەکردن ناوە. عێراق ئەمڕۆ بە متمانەی تەواوەوە بە خۆی، لەگەڵ کۆمەڵگەی نێودەوڵەتی دا بەرەو کامڵبوون هەنگاو دەنێت و پشت ئەستوورە بە دیدگایەکی رۆشن کە لەسەر هاوکاری و هاوبەشیی کارا لەگەڵ دەوڵەتانی دۆست و دەستەخوشک دامەزراوە و کار بۆ بەدیهێنانی ئاییندەیەکی باشتر بۆ گەلەکەمان دەکات.
حکومەتی ئێمە لە ماوەی ئەم دوو ساڵەی رابردوودا پێداگر بووە لەسەر گرتنەبەری سیاسەتێک کە لەسەر بنەمای "عێراق بەر لە هەر شتێک" دامەزراوە. دەمانەوێت بەرژەوەندییەکانی عێراق و گەلەکەی لە پێشی پێشەوەی کارەکانمان بێت. ئەوە سەرباری کارلێکی ئەرێنییانە لەگەڵ وڵاتانی دەوروبەرمان و کۆمەڵگەی نێودەوڵەتیش.
پەیوەندییەکانی خۆمان لەگەڵ دەوڵەتانی دۆست و دەستەبرا لەسەر بنەمای بەرژەوەندیی هاوبەش و رێزگرتنی دوولایەنە بەهێزتر کردووە، بەوەش عێراقمان کردووەتە پردی گفتوگۆ و هاوکاری و بەشدار بووە لە بەدەستهێنانەوەی رۆڵی پێشڕەوانەی لە ناوچەکەدا. ئەمەش لە سایەی تێگەیشتنێک کە وەکو رێبازێکی کردەنی گرتوومانەتەبەر، ناومان لێناوە "دیپلۆماسیی بەرهەمدار". بۆیە کرانەوەی عێراق لەسەر هەردوو ئاستی هەرێمی و نێودەوڵەتی، بەشێکە لەو رێبازەی کاری لەسەر دەکەین، بۆئەوەی هاوبەشییە ئابوورییەکانمان فراوانتر بکەین و سوود لە شارەزایی نێودەوڵەتی وەربگرین بۆ بەهێزکردنی ئابووریی نیشتمانی. ئەم هەوڵانەشمان بە تەنیا لەگەڵ یەک لایەنی دیاریکراو نییە، بەڵکو هەموو هاوبەشەکانمان لە کۆمەڵگەی نێودەوڵەتی دەگرێتەوە.
ئێمە بەردەوامین لە بەهێزکردنی هاوکاریمان لە هەموو بوارەکان دا، بۆئەوەی بتوانین بەدیهێنانی گەشەی بەردەوام و سوودی دوولایەنە مسۆگەر بکەین، بۆ ئەم مەبەستەش دەستمان دایە پڕۆژەی هێڵی گەشەپێدان بۆئەوەی ببینە پردێکی ئابووری و کۆمەڵایەتی و کولتووری لەنێوان ئاسیا و ئەورووپا. هەروەک بەردەوامیش کارمان لەسەر بەهێزکردنی هاوکاریی ئەمنی و بەرەنگاربوونەوەی تیرۆر کردووە و پەیوەندیی پتەومان لەگەڵ وڵاتانی ئەندامی هاوپەیمانیی نێودەوڵەتی، لە سەرووی هەمووشیانەوە ویلایەتە یەکگرتووەکانی ئەمریکا، هەیە. ئێمە ئێستا لە سەروبەندی دانوستاندنێکی دوولایەنەداین لەگەڵ ئەو دەوڵەتانەی ئەندامی هاوپەیمانیی نێودەوڵەتین، ئەوەش بۆئەوەی بتوانین چوارچێوەیەکی روون و دیار بۆ هاریکاریی دوولایەنە بۆ بەرەنگاربوونەوەی تیرۆر و تووندئاژۆیی دابنێین، بەوەش بەدیهێنانی ئاسایش و سەقامگیری لە عێراق و ناوچەکەدا مسۆگەر بکەین، هەنگاو بەرەو پەیوەندیی دوولایەنە لەگەڵ هەموو وڵاتانی ئەندامی هاوپەیمانیی نێودەوڵەتی بنێین.
ئەو بابەتانەی لەم کۆڕبەندەدا دەخرێنە بەر گفتوگۆ، ئینجا چ ئەوانەی پەیوەندییان بە ئاسایشی ناوچەکەوە هەیە، یان ئەوانەی پەیوەستن بە کێشە و ئاستەنگە ئابوورییەکانەوە، بەتایبەتیش لە بواری وزە و گۆڕانکارییەکانی کەشوهەوا، یاخود سەقامگیریی سیاسی و پەیوەندییە نێودەوڵەتییەکان، هەموویان جەخت لە گرنگیی کاری هاوبەش دەکەنەوە لەنێوان هەموو کاراکتەرە سیاسییە نێودەوڵەتی و هەرێمییەکان، بۆ بەرەنگاربوونەوەی ئاستەنگەکان و بەهێزکردنی هاریکاری لەپێناوی بەدیهێنانی گەشەی بەردەوام.
ئەم کابینەیەی ئێمە کاری زۆری بۆ دۆزینەوەی چارەسەری هەمیشەیی کردووە، بەتایبەتی بۆ ئەو کێشانەی بە کێشەی هەڵپەسێردراوی نێوان بەغدا و هەولێر ناودەبران. ئێمە ئەوەمان هەڵگێڕایەوە بۆ هەل و دەرفەتی هاریکاری و پێگەیشتن. توانیمان ئەو کێشانە لە چوارچێوە سیاسییەکانیان دەربهێنین و بیانخەینە چوارچێوەی یاساییەوە. پاش تێپەڕاندنی هەمواری یاسای بودجەش، ئێستا کار لەسەر ئەوە دەکەین رێکارەکانی هەناردەکردنەوەی نەوتی خاو بۆ بەندەری جەیهان تەواو بکەین، لاپەڕەیەکی نوێ لەگەڵ ئەو کۆمپانیایانە بکەینەوە کە لە هەرێمی کوردستان کار دەکەن، بە جۆرێک کە بەشدار بێت لە بنیاتنانی ئابووریی عێراق و مافی هاونیشتیمانیی هەرێمی کوردستانیش مسۆگەر بکات، ئەوەش لە رێگەی گەرەنتیکردنی ئەوەی کە مافی خۆیان بەبێ هیچ کەموکوڕییەک لە مووچە و شایستە داراییەکانی دیکەیان وەرگرن.
ئامادەبووانی بەڕێز،
ئەمڕۆ ناوچەکەی ئێمە بە کۆمەڵێک گۆڕانکاریی گەورەدا تێدەپەڕێت، کە لە دەیان ساڵی رابردوودا وێنەی نەبووە. کەرتی غەززە و لوبنان جەنگێکی بێڕەحمانەیان بەخۆوە بینی، کە هێزەکانی قەوارەی داگیرکەر لەو دوو ناوچەیەدا کردیان و تێیدا هەموو پێداویستییەکی ژیانیان کردە ئامانج، ئێمەش ئەوپەڕی توانای خۆمان خستەگەڕ بۆئەوەی عێراق لە ئاگری ئەو جەنگە بەدوور بگرین، ئەوە سەرباری بەتەنگەوەچوونمان بۆ برایانمان لە لوبنان و فەلەستین، چ بە ناردنی هاوکاری و چ بە بانگەوازمان لە کۆڕ و کۆبوونەوە نێودەوڵەتییەکاندا بۆ راگرتنی ئەو جەنگە. لە روانگەی پێبەندیشمانەوە بە پشتیوانی لە سەقامگیریی ناوچەکە، پشتیوانیمان بۆ گەلی سووریا و مافی گەلی سووریا لە دیاریکردنی چارەنووسی خۆی دەربڕیوە، پشتیوانیمان لە هەموو ئەو دەستپێشخەرییانە کردووە کە پێمان وابووە هاوکار دەبن لە گێڕانەوەی ئاسایش و سەقامگیری بۆ سووریا. ئەوەش لە باوەڕمانەوە بە هاوچارەنووسی و پێویستیی بەهێزکردنی هاوپشتیی عەرەبی و هەرێمایەتی.
سوپاسی خۆم بۆ هەموو ئێوەی بەڕێز دووبارە دەکەمەوە، هیوا دەخوازم ئەم کۆنگرەیە سەرکەوتوو بێت و بە کۆمەڵێک راسپاردەی بنیاتنەرانەوە کۆتایی بێت، کە بتوانێت خزمەتی عێراق و ناوچەکە بکات.
سڵاو و رەحمەت و بەرەکەتی خواتان لێبێت.
