RRC |

ئا: مەحموود بابان-ناوەندی لێكۆڵینەوەی رووداو|

هەڵبژاردنی سەرۆککۆماری لە ئێران-2021

رۆژی 16ی حوزەیران 2021 ناوەندی لیکۆڵینەوەی رووداو لە دوو پانیڵی جیاوازدا و بە بەشداریی لێکٶلەران، پسپۆڕان و بەرپرسانی یەکەمی پارتە سیاسییەکانی رۆژهەڵاتی کوردستان  لە ناوەندی لێکۆڵینەوەی رووداو لەهەولێر تیشکی خستەسەر هەڵبژاردنی سەرۆککوماری لە ئێران-2021.

رۆژی 18ی حوزەیران 20201 ئێران بەرەو دیاریکردنی سەرۆککومارێکی نوێ دەچێت، کە  لایەک بە پرۆسەیەکی رەوای دەزانێت و لایەکی دیکەش بە هەڵبژاردنێکی شانۆیی ناوی دەبەن، هەر چۆنێک بێت ئەمە لە كاتێكدا دەكرێت كە ئێران لەلایەك گیرۆدەی چەندین كێشەی گرنگی وەك كۆرونا، قەیرانی ئابووری و پرسەكانی سیاسەت و پەیوەندییە دەرەكییەكانی بووەتەوە، کە لەوانەیە ئەم هەڵبژاردنە ئاراستەی داهاتووی گوڕانکارییەکان بەشێوەیەک لە شێوەکان بگوڕێت.

پانیڵی یەکەم بە بەشداریی، د. عەلاء حەمید، شارەزای کارووباری ئێران لە بەغدا، محەممەد هەورامی، شارەزای کارووباری ئێران، د. پەروێز رەحیم، لێکۆڵەر و مامۆستای زانکۆ، محەممەد حوسەینی، شرۆڤەکاری سیاسی ئوردنی بەڕێوەچوو، کە تێدا هەڵسەنگاندنێکی گشتی بۆ هەڵبژاردنی 2021 سەرۆککوماری ئێران کرا.

پانیڵی دووەم بە بەشداریی چوار سەرۆکی پارتە سیاسییەکانی رۆژهەڵاتی کوردستان، موستەفا هیجری، لێپرسراوی حیزبی دێموکراتی کوردستان ئێران، خالید عەزیزی، سکرتیری حیزبی دێموکراتی کوردستان، عەبدوڵڵا موهتەدی، سکرتیری گشتیی کۆمەڵە، عومەر ئیلخانیزادە، سکرتێری گشتی کۆمەڵە زەحمەتکێشانی کوردستان لە ناوەندی لێکۆڵینەوەی رووداو، روانگەی کوردی بۆ هەڵبژاردنی سەرۆککوماری ئێران خرایەروو.

لە پانیڵی یەکەمدا د.عەلاء حەمید، ئاماژەی بەوەکرد ئەم هەڵبژاردنەی سەرۆککوماری ئێران لەمیژووی کۆماری ئیسلامی ئێراندا گرنگی و تایبەتمەندی خۆی هەیە، د. عەلاء حەمید گوتی “بۆ تیگەیشتن لەم هەڵبژاردنە و هێزی سیاسی لە ئێران پێویستە کەمێک بگەڕێنەوە دواوە و هەندێک قۆناخی گرنگ لە میژووی ئێران دەستنیشان بکەن، بۆ نموونە  ساڵی 1981 کە هێڵە سەرەکییەکانی رەوتە سیاسییەکان و  سیاسەتی ناوخۆیی و دەرەکی ئێران دەستنیشاندەکرێت، سێ ئاراستە لەخۆدەگرێت ئەوانیش ئاراستەی ئیمام، ئاراستەی شۆڕش و ئاراستەی چەپ (بەرامبەر)”.

لە درێژەی قسەکانیدا، د. عەلاء حەمید  گوتی ” لە هەر سێ قۆناخی گرنگی میژووی کۆماری ئیسلامی ئێراندا، ساڵی 1979 و ساڵی 1989 و 2009، دەتوانرێت بگوتریت تەنیا  دوو رەوتی سەرەکی موحافزکار و ریفورمخواز لە ئێراندا نەبووە، بەڵکۆ لەو ماوەیەدا باڵێكی ناوەندی یاخود نیوەندگیر کە لە ئەنجومەنی ئاسایشی ئێرانەوە سەری هەڵدا و حوسەین موسەوی سەرپەرشتی دەکرد هاتە ئاراوە، کە  کاریگەری لەسەر پەیوەندی دەرەکی و سیاسەتی دەرەوەی ئێران هەبووە، کە ئەم رەوتە داوادەکات ئێران بەرەو جیهانی پیشکەوتووی رۆژئاوا بڕوات بۆ ئەوەی پێشبکەوێت، بەڵام لەگەڵ حەسەن روحانی رەوتی سێیەم سەریهەڵدا، کە رەوتی میانڕەوانن، بەڵام لەناوخۆی ئێران رەوتی جیاواز هەیە و هێڵی جیاواز پەرەی سەندووە.

د. عەلاء حەمید ئاماژەی بەوەکرد لەگەڵ ئەم هەڵبژاردنەدا چەند قەیرانێک سەریهەڵداوە، قەیرانی یەکەم، قەیرانی رابەر یاخود راهبەری ئێران، چونکە بەگویرەی راپۆرتەکان خامنەیی رابەر نەخۆشە، قەیرانی دووەم، قەیرانی داراییە، کە هەڵئاوسانێکی دارایی زۆر هەیە، هەروەها یەکلانەبووەتەوە ئایا چ جۆرە مۆدیلێکی ئابوورییە، قەیرانی سێیەمیش یەکخستنی ئاراستەی دامەزروە فەرمییەکانی دەوڵەت، چونکە لەماوەی رابردوودا چەند هەوڵێک هەبووە بۆ رکابەری رابەر، لەبەرئەوەی رابەر دەسەڵاتی راگەیاندنی جەنگ و پەیوەندییەکانی دەرەوە و هتد بەرێوەدەبات. بۆیە دەڵێم لەم هەڵبژاردنەوە دەستنیشانی جێگرەوەی رابەر دەکات و دەبێت موحافزکاریش بێت، ئەویش بۆ چاوخشاندنەوە بە دەسەڵاتی دامەزراوەکان و یەکخستنی دامەزراوەکان.

سەبارەت بە ئەنجامی هەڵبژاردنی سەرۆککوماری ئێران و کاریگەرییەکانی لەسەر ناوخۆ و دەرەوەی ئێران و پەیوەندییەکانی ئێران بە دەرەوە، د. پەرویز رەحیم، مامۆستای زانکۆی گوتی “دەبێت جیاوازییەک بکەین، ئێران ئەکتەرێکی ئاسایی نییە، ئەویش بەهۆی جۆری ناسنامەکەیەوە”. هەروەها لەبارەی هەڵبژاردنی سەرۆککوماری ئێران دەڵێت “دەبێت جیاوازی لە نێوان هەڵبژاردن و دەنگدان بکەین، چونکە لە ئێران تەنیا دەتوانرێت دەنگ بدرێت و ئەمەش لە زانستی سیاسی دوو شتی تەواو لە یەکدی جیاوازن، لەراستیدا دەسەڵاتدارانی ئێران ئەمەیان پێویستە بۆ رەوایەتی دان بەخۆیان لەناوخۆ و دەرەوە، بەتایبەتیش لەسەر ئاستی دەرەوە”.

لە درێژەی قسەکانیدا، د. پەرویز رەحیم گوتی لەراستیدا گەورەترین قەیرانی ئێستای ئێران، قەیرانی رەوایەتییە، دوای هەموو ئەو ئەزمە و کیشە ناوخۆیی و دەرەکیانەی رووبەڕووی بووەتەوە، لەهەمووشیان گرنگتر لەماوەی رابردوودا ناڕەزایەتی گەورەی ساڵانی 2017 و 2019، کە بە گوتەی بەرپرسانی ناوخۆیی ئێران، دەسەڵاتی کۆماری هاتبووە لیواری رووخان، چونکە بازنەی ئەو کەسانەی پێدەوترێت “خودی” بچووک ببوونەوە لەو کاتەدا.

د. پەرویز رەحیم لەبارەی گرنگی ئەم هەڵبژاردنەوە دەڵیت بۆ یەکەمجارە بە ئاشکرا ئەندامیکی ئەنجومەنی باڵای پاراستی دەستوور رای بگەیەنێت رێژەی بەشداریی هیچ کاریگەرییەکی لەسەر رەوایەتی دان بە هەڵبژاردنەکە نابێت، لەکاتێکدا و لەپێشتردا لە رابەرەوە تاوەکو خوارەوە بەشدارییکردنیان لە هەڵبژاردن بە ئەرکێکی نەتەوەیی و ئاینی دەزانی، لەم رێگەشەوە رەوایەتی لەناوخۆی ئێران و لەسەر ئاستی دەرەوە وەەردەگرت.

د. پەرویز رەحیم ئاماژەی بەوەکرد “پێشتر لێکۆڵەران دەیانگوت هەموو 10 ساڵێک ئەزمەیەک یاخود کێشەیەک لە ئێران روودەدات، بەڵام ئێستا ئەم 10 ساڵە نەماوە بووتە 2 ساڵ جارێک، بۆ نموونە لەساڵی 1999 کە قوتابیان دەڕژینە سەر شەقامەکان، دواتریش ساڵی 2009 گرووپی سەوز سەریهەڵدا، کە هیچ کامیان فشاریان نەخستە سەر سیستەمی کۆماری، بەڵام لەساڵی 2017 و 2019 باس لە نەمانی سیستەم دەکرا و فشار کەوتە سەر سیستەمی کۆماری ئیسلامی ئێران”.

لەبارەی ئەنجامی هەڵبژاردنی سەرۆککۆماری ئێران گوتی “راستە حکومەتی ئێران دایناوە رەئیسی دەربچێت، هەربۆیەش شیاوەتی زۆربەی بەربژیرەکان رەتکرایەوە و  پەسەند نەکرا، چونکە دەیانەوێت ئەم جومگەیەی دەسەڵاتیش مسۆگەر بکەن و سەر بەخۆیان بێت، بەڵام هەموو ئەگەرێک کراوەیە لە بەردەم خەڵکی ئێراندا لەم هەڵبژاردنەدا”.

د. پەرویز رەحیم لەبارەی ئامار و ئاماژەکانی ئەم جارەی دەنگدانی هەڵبژاردنی سەرۆککۆماری ئێران  گوتی “لەراستیدا لە ئێران دوو جۆر ئامار هەیە، یەکەمیان ئامارە فەرمییەکانن، کە جێگەی متمانە نین، بەڵام ئەگەر ئاماری ناوەندی “ئیسپا”، کە ناوەندی راپرسی یاخود پێوانەکردنی رای گشتی ئێرانە وەربگرین، ئەوا بەپێی چەند راپرسێکی  جیاوازی یەک لەدوای یەک، 42% خەڵکی لە هەڵبژاردن بەشداریی دەکەن، بەڵام راست نییە، چونکە پێشتر گووتیان بەشداریی لە تاران 25% بووە، بەڵام بەگوتەی عەباسی ئاخوندی، وەزیری پێشووی ناوخۆ لە کابینەکەی روحانی لە تاران کەمتر لە 16% بەشداریی خەڵک  هەبووە لەو هەڵبژاردنەدا. لەلایەکی دیکەوە ناوەندی گەمان بۆ راپرسی، کە تاڕادەیەک لەماوەی رابردوودا ئامارەکانیان درووست بووە، راپرسییەکیان لەنیو 68 هەزار کەسدا ئەنجامداوە، بەپێی ئەنجامەکانیش 75% بەشداربووان بڕیاری کۆتاییان داوە و بەشداریی هەڵبژاردن ناکەن، بەڵام 18% بەشداربووان گووتیانە بەدڵنیاییەوە بەشداریی دەکەین، ئەمەش دەریدەخات دەنگی خۆڵەمیشی نەماوە، لەبارەی ئەوەی بۆچی بەشداریی هەڵبژاردن ناکەن، 71% بەشداربووان رایانوایە “ئەم هەڵبژاردنە ئازاد و کاریگەری نییە”.

لە کۆتایی قسەکانیدا د. پەرویز رەحیم گوتی  چوار خاڵ هەیە کە کاندید پشتی پێدەبەستێت و ناتوانێت لێدەربچێت یەکەمیان پاڵپشتیکردن لە ویلایەتە، دووەمیان راستەوخۆ دژایەتی ئەمریکا بکەێت، سێیەمیان نەمانی ئیسرائیل، کە کۆڵەکەی سیاسەتی دەرەوەیە  و چوارەمیان هەناردەکردنی شۆڕش بۆ دەرەوە لە چوارچیوەی جیاوازدا”.

لەبارەی کاریگەرییەکانی ئەم هەڵبژاردنە لەسەر سیاسەتی دەرەوەی ئێران و پەیوەندییەکانی ئێران لە ناوچەکە و ئێران بەرەو کۆی دەڕوات لەدوای ئەم هەڵبژاردنەوە، محەممەد هەورامی، شارەزای کارووباری ئێران گوتی “هەڵبژاردنی ئەمجارە لە گشت هەلبژاردنەکانی دیکە جیاوازە و زیاتر جگە لەوەی هەڵبژاردنی سەرۆککومار بێت، هەڵبژاردنی رابەری داهاتووی ئێرانە، ئەم سیناریۆیانەی ئێستا هەیە، هەمان ئەوانەیە کە لەساڵی 1361دا بۆ هەڵبژاردنی ئایەتوڵلا خامنەیی بۆ سەرۆکایەتی کۆمار روویدا، لەو کاتەدا 3 کەس بەربژیر بوو، کە زۆر جەختیان لە کارامەیی خامنەیی دەکردەوە، ئامانجیان بوو رەوایەتێکی زۆری پێبدەن و ئامادەکاری بۆ بکەن بۆ رابەر، بۆیەش ئەم هەڵبژاردنەش هەمان شتە، دەیانەوێت رێژەی بەشداریی هەرچەندە بێت. هەمان رێژەی ئەوکاتی خامنەیی بۆ رەئیسی دووبارە ببێتەوە، بەڵام لەوانەش نییە رێژەکە 95% بێت بۆ رەئیسی وەکو ئەوەی خامنەیی”،

لەبارەی دەرچوونی بەربژیرەکانی سەرۆککوماری ئێران لە رۆژی 18ی حوزەیراندا، محەممەد هەورامی گوتی “دەرچوونی رەئیسی هیچ گومانێکی تێدا نییە، لەم یەک بۆ دوو رۆژەی داهاتوودا کاندیدەکانی دیکەش دەکشینەوە، لەوانەش هاشمی و جەلیلزادە، ئەمڕۆش میر عەلی زادە کشاوەتەوە، کەواتە تەنیا رکابەری رەئیسی، هیمەتی دەمینێتەوە کە سەرۆکی بانکی ناوەندی ئێران، بەکورتیش لە سەردەمی ئەمدا رێژەی هەڵئاوسانی ئابووری  زیادیکردووە، بەهای تمەن لە 11 هەزار و بووەتە 22 هەزار تومەن بەرامبەر بە دۆلاری ئەمریکی، بۆیەش رەئیسی بێ رکابەرە و بەدڵنیاییەوە دەردەجێت.

لە درێژەی قسەکانیدا محەممەد هەورامی گوتی ” لەراستیدا لە ئێران سەرۆککومار هیچ دەسەڵاتێکی لەسیاسەتی دەرەوە نییە و ناتوانێت هیچ گوڕانکارییەک بکات، سیاسەتی دەرەوەی ئێران ناگۆرێت نەک بە رەئیسی بەڵکۆ بە هەر سەرۆککومارێکی دیکە، بەڵکۆ ئەمە لە دەسەڵاتی رابەر دایە، ئەویش تاوەکو ئێستا هیچ ئاماژەیەکی وای نییە بۆ گوڕانکاری، هەربۆیەش سیاسەتی دەرەوەی ئێران وەکو خۆی دەمینێتەوە”. هەروەها گوتی “حکومەتی ئێران پێویستی بە بەشداریی خەڵک لە هەڵبژاردنەکان نەماوە و لەوە دەرچووە، سەرەتا پێویستی بووە بەتایبەت لە 10 بۆ 15 ساڵی سەرەتادا، لەراستیشدا ئێستا لەوە دەرچووە پێویستی بەدەنگی خەڵک بێت”.

روانگەی کوردی بۆ هەڵبژاردنی سەرۆککوماری ئێران 2021

لە پانیڵی دووەمدا، روانگەی کوردی بۆ هەڵبژاردن سەرۆککوماری ئێران خرایەڕوو، کە تێدا ئەو گوڕانکارییانە چین سەبارەت هەڵبژاردنی سەرۆککومار و پەیوەست بە کورد و ئامادەکاری هێزە کوردییەکانی رۆژهەڵات بۆ قۆناخی نوێ لە ئێران و تاوەکو چ رادەیەک دەبێتەهۆی نوێبوونەوەی ئێران و هەڕەشەکانی سەر کۆماری ئیسلامی ئێران.

موستەفا هیجری، لێپرسراوی حیزبی دێموکراتی کوردستان ئێران لەبارەی هەڵبژاردنی سەرۆککومار گوتی ” ئەوەی ئێستا لە ئێران لەبارەی هەڵبژاردن و خەباتی مەدەنی و چالاکی سیاسییەوە هەیە، ئێمە لەسەرەتاوە لەکاتی هاتنە سەرکاری کۆماری ئیسلامی ئێران رەتمانکردووەتەوە، ئەو خەڵکەی لەسەرەتادا لایەنگری کۆماری ئیسلامی بوون، ساڵ بە ساڵ بۆیان دەرکەوت، لەرووی ماف و ئازادی و رەوشی ئابووری و سیاسییەوە، ئێستا دوای 40 ساڵ خەڵکی ئێران و ئەوە کەسانەی ئەو دەمە لایەنگری کۆماری ئیسلامی بوون گەیشتوونەتە ئەو قەناعەتەی، کە ئێمە لەسەرەتادا هەمانبوو”. هەروەها گوتی “دوای 40 ساڵ خەڵک گەیشتوونەتە ئەو قەناعەتە دەنگ نەدەن و بایکۆتی بکەن، ئەو بایکۆتەی ئێمە لەسەرەتادا بڕیارماندابوو، ئێستا کەمپەین و گرووپ و شیوازی جیاواز بۆ رەتکردنەوەی دەنگدان و بایکۆتکردنی هەڵبژاردن ئەنجام دەدەن”.

لە درێژەی قسەکانیدا موستەفا هیجری گوتی ” لەسەرەتاوە تاوەکو ئێستا سەرۆککومار و دەوڵەت هیچ دەسەلاتێکی نەبووە، ئەوانەی دانراون سیاسەتی رژیمی ئێران بەرێوەدەبات و هیچ پەیوەندییەکی بە خەڵکەوە نییە، هەروەها پیویستە وەک کورد نەچین بۆ دەنگدان و بایکۆتی بکەین خۆمان بۆ دوای هەڵبژاردن ئامادە بکەین ، یەکخستنی هێزەکانی ئۆپۆزسیۆن کورد و کارکردنی هاوبەش و لێکنزیکردنەوەی هێزەکانی کورد و یەکخستنی خەڵکی کورد لەناوخۆ”.

عەبدوڵڵا موهتەدی، سکرتیری گشتیی کۆمەڵە لەبارەی هەڵبژاردنەوە گوتی “هەلبژاردن مافێکە و یەكیکە لە بنەماکانی دیموکراسی  ومافی مرۆڤ و نیشاندەری ئازادی مرۆڤە، بەڵام ئەمە لە ئێراندا نییە، خەباتی مەدەنی کورد لە ئێران، ئەگەر پێشکەوتوو تر نەبێت لەوانی دیکە ئەوە لەدوا نییە، لە سەرەتاشدا بەشدارییی هەبووە، بەڵام رەتکراوەتەوە و کورد بێبەش کراوە لە مافی سەرەتایی خۆی”.

لە درێژەی قسەکانیدا عەبدوڵڵا موهتەدی گوتی ” هەڵبژاردن لە ئێران بە حوکمی دەستوور دەبێت پیاو بێت و نابێت ژن بێت، دەبێت شیعە بێت و ناتوانیت سوننە یاخود ئاینێکی دیکەی هەبێت، دەبێت باوەڕی بە ویلایەتی فەقی هەبێت، کە ئەمانە بەربەستی گەورەن لە بەردەم هەڵبژاردنێکی ئازاد لە ئێران”. هەروەها، سەرچاوەی بایکۆتکردنی هەڵبژاردن ئەمجارە لەوەوە سەرچاوە دەگرێت، لەماوەی 42 ساڵی رابردوودا  هیچ ساڵێک وەکو ئەمجارە نەمدیوە خەڵک گووتوویەتی یاخود بە ئاشکرا رایانگەیاندووە کە بایکۆتی دەکەن و بە ڤیدیۆ و تۆماری دەنگی و رێگەی جیاواز بە ئاشکرا بڵاویدەکەنەوە.

لە کۆتایی قسەکانیدا، عەبدوڵڵا موهتەدی دەڵێت “حەقە ئەمجارەش کورد بەتەواوی بایکۆتی هەڵبژاردن بکات و سەرمەشقی بایکۆتکردن بێت وەکو چۆن لە سەرەتادا رەتیکردووەتەوە. هەروەها،  لە هاوسەنگی روحی  نێوان دەسەڵات و خەڵکدا، هەنگاوێکی باش  و سەرکەوتنێکی باش بۆ خەڵک بەدەستدێت.

عومەر ئیلخانیزادە، سکرتێری گشتی کۆمەڵە زەحمەتکێشانی کوردستان لەسەر هەڵویستی کورد و نادیموکراتی ئێران گوتی “کورد لەسەرەتاوە هەڵویستی هەبووە و رەتیکردووەتەوە، ئێستا قۆناخێکی نوێیە و کۆماری ئیسلامی ئێران لە دەرەوە پەراویزخراوە لەناوخۆش تاوەکو دێت بازنەی دەسەڵاتی بچووک و بچووکتر دەبێتەوە، لە نیو دەزگا و کاربەدەستانی دەسەڵاتی کۆماری ئیسلامیدا لیکترازان هەیە و دابڕانێکی گەورە لەنێوان خەڵک و دەسەڵاتدا هەیە”.

لەدرێژەی قسەکانیدا عومەر ئیلخانیزادە  لەبارەی هەڵبژاردنەوە گوتی ” کورد بەدوای مافی نەتەوەی خۆی کەوتووە، هەر بۆیەش 42 ساڵ لەمەوبەر دەنگی نەدا و گوتی نا بۆ ئەم دەستوورە، هەروەها پێویستە  کورد بەتەواویی جارێکی دیکە بایکۆتی ئەم هەڵبژاردنە بکات و بیکات بە یەکگرتوویەکی نەتەوەیی. هەروەها، ئۆپۆزسیۆنی کوردی دانەبڕاون لە بزوتنەوەی کوردی و جیاوازییەکی گەورەی لە ئۆپۆزسیۆنەکانی دیکەی ئێران هەیە، پێویستە کورد نیشانی بدات گوتارەکەی یەکگرتووە و بە یەکگرتوویی دەمینێتەوە بۆ ناوخۆ و دەرەوە.

خالید عەزیزی، سکرتیری حیزبی دێموکراتی کوردستان، دوایین بەشداربووی دووەم پانیڵی ناوەندی لێکۆڵینەوەی رووداو بوو، لەنارەی وانگەی کوردی بۆ هەڵبژاردنی سەرۆککوماری ئێران 2021 و گوتی ” لەبارەی هەڵبژاردنی ئەمجارەوە،  ئەوەی لێرەدا گرنگە دوای هەڵبژاردن و ئێمە کۆدەنگیمان لەسەر بایکۆتکردن هەیە، لەماوەی رابردوودا هەڵبژاردن کراوە، قوربانیش لەنیوخۆ هەبووە”.

لەبارەی درووستکردنی پارتێکی سیاسی لەنیوخۆی رۆژهەڵاتی کوردستان و بەشداریکردنی لە کایەی سیاسیدا لە ئێراندا، خالید عەزیزی گوتی ” درووستکردنی پارتێکی سیاسی لەسەر بنەمای نەتەوەیی لە رۆژهەڵاتی کوردستان دەگەڕێتەوە سەر خودی خەڵکی رۆژهەڵات، بەڵام ورەی خەڵکی رۆژهەڵات بەرزە و لەنیوخۆی وڵات بۆچوونی جیاواز هەیە”.

خالید عەزیزی، لەبارەی جمووجوڵەکانی نیوخۆی رۆژهەڵاتی کوردستان گوتی “ئێمە خۆشحاڵین و دەکرێت کەسانی دیکە کە لەناوخۆ و لەژێر دەسەڵاتی کۆماری ئیسلامیدا لەوانەیە ئەزموون و دەرفەتی جیاواز و بۆچوونی خۆیان هەبێت، هەربۆیەش وەکو  حیزبی دێموکراتی کوردستان ئێمە پاڵپشتی هەمەجۆری  دەکەین، ئەگەر کۆماری ئیسلامی و حکومەتی ئێران قبووڵی بکەن”.

لەبارەی پەیوەندی نیوخۆی پارتە سیاسییەکانی رۆژهەڵاتی کوردستان و ئۆپۆزسیۆنی ئێرانی لە دەرەوە، خالید عەزیزی گوتی ” ئێستا کۆماری ئیسلامی لەبازنەیەکی کیشەی نیوخۆی خۆیدایە لە دەسەڵات و لەسەر ئاستی دەرەوەش، بۆیە ئەرکێکی گەورە دەخاتە سەر ئێمە، لە دوای هەڵبژاردن دەبێت گفتوگۆ لەسەر بکەین و ئامادەکارییەکان بخەینەڕوو”.

لەکۆتایی ئەم چالاکییەی ناوەندی لێکۆڵینەوەی رووداو، لێکۆڵەران رایانوابوو، رەئیسی بەربژیری براوەی هەڵبژاردنی سەرۆککوماری ئێران، گرنگی هەڵبژاردنی ئەمجارەش پەیوەندی بە دانانی جێگرەوەی رابەرەوە هەیە، هەروەها، سەرکردەی پارتە سیاسییەکانی رۆژهەڵاتی کوردستان جەختیان لە رەتکردنەوە و بایکۆتکردنی هەڵبژاردن کردەوە وەکو چۆن لەسەرەتاوە رەتیانکردووەتەوە.